На главную   |    Рекомендуем - {sape_links}


Уастырджийы фӕлгонц


Ӕрдз йӕ бирӕ хуызтӕй рӕсугъд у. Цард дӕр — афтӕ. Бирӕхуызджын та йӕ кӕнынц адӕм: се 'взӕгтӕй, ӕгъдӕуттӕ ӕмӕ суанг сӕ дзаумайы кондӕй дӕр. Фылдӕр адӕмтӕн ис сӕхи уаз бынӕттӕ — кувӕндӕттӕ, сӕхи зӕдтӕ ӕмӕ дауджытӕ, ӕмӕ ма суанг хицӕн динтӕ дӕр. Стыр Хуыцау се 'ппӕтӕн дӕр иу у, кӕд ӕм алы нӕмттӕй дзурынц — кувынц, табу йын кӕнынц, уӕддӕр. Сӕ цӕстытыл дӕр уайы алыхуызон, уынгӕ та йӕ никуы ничи фӕкодта - адӕммӕ йӕхи никуы равдыста. Цӕры ӕвдӕм уӕларвы. Ирон адӕмы хъуыдымӕ гӕсгӕ йӕм ӕнӕхонгӕйӕ, ӕнӕфӕдзургӕйӕ ссӕуыны бар ис ӕрмӕстдӕр Уастырджийӕн. Гъе, уымӕ гӕсгӕ нӕм ӕппӕт зӕдтӕй у кадджындӕр.
Уастырджийы хонӕм Стыр Хуыцау ӕмӕ ирон адӕмы ӕхсӕн дыууӕрдӕм минӕвар. Ома, Хуыцауы ирон адӕммӕ исты хъуыддаг куы вӕййы, уӕд рарвиты Уастырджийы. Уый сыл йӕ арм дары ӕмӕ, Хуыцауы раз куы балӕууы, уӕд ирон адӕмӕн куры йӕ хорздзинӕдтӕ, хизы сӕ йӕ фыдӕхӕй.
Уастырджи уӕларвӕй зӕхмӕ куы ӕртӕхы йӕ ӕрткъахыг бӕхыл, уӕд, кӕмыты ӕрбадт, уыцы бынӕттӕ ирон адӕмӕн систы уаз бынӕттӕ — кувӕндӕттӕ. У ӕргом зӕд, ома, ӕргом рацӕуы ирон адӕммӕ, ӕмӕ йӕ фенынц, сныхас кӕны семӕ. Ирон адӕмон сфӕлдыстады ма сӕм зӕххон зӕронд лӕджы хуызы дӕр рацӕуы. Цӕмӕй йӕ ма базоной, ӕмӕ сӕ фӕлвары ӕгъдауӕй, зӕрдӕйы хорзӕхӕй, адӕймагдзинадӕй.
Уастырджийы, дам, чи федта, уыдон, стӕй йӕ адӕмон сфӕлдыстады дӕр ныв кӕнынц урс зӕлдагзачъе зӕронд лӕджы хуызы, рӕвдауӕг цӕстӕнгасимӕ, мидбылхудгӕ рухс цӕсгомимӕ, хуымӕтӕг, фӕлӕ — сыгъдӕг цӕхӕртӕкалгӕ ирон уӕлӕдарӕсы, йӕ рахиз къухы хӕцӕнгарз нӕ, фӕлӕ ис ехс, йӕ галиуы та — бӕхы рохтӕ. Тыхгӕнджыты сӕтты, ссӕнды йӕ иу тызмӕг ракастӕй дӕр. Иӕ бӕх у рӕсугъд, урс, хонынц ма йӕ цъӕх бӕх дӕр, йӕ цӕфхӕдтӕй цӕхӕртӕ калы, арт уадзы, ӕмӕ йӕ уымӕ гӕсгӕ хонынц ӕрткъах. Ис ын ӕмбаргӕ цӕстӕнгас, йӕ барӕгимӕ у ӕнгом, у йын коммӕгӕс, йе 'мцӕдисон.
Ахӕм хуызы сӕ ныв кӕнынц иуӕй-иу нывгӕнджытӕ. Иннӕтӕ Уастырджийы ивддзаг кӕнынц чырыстон дины хӕстон адӕймаг, йӕ амӕлӕты фӕстӕ уаз чи сси, уыцы сыгъдӕгуд Георгиимӕ. Ӕвдисынц ӕй ӕрыгон хӕстонӕй ӕмӕ ма суанг уӕлбӕхӕй арцӕй залиаг калм маргӕйӕ. Историйы куыд баззад, ахӕмӕй.
Уастырджимӕ ирон адӕм кувынц бирӕ мин азты дӕргъы. Йӕ кой кӕны историйы фыд Геродот дӕр ма. Уый та цард 2500 азы размӕ ӕмӕ балцы уыд нӕ рагфыдӕлтӕ скифтӕм. Хоны йӕ Таргитай. Номы кӕрон - тай у бердзенаг дзырдты фӕсӕфтуан. Ном Таргимӕ уаз-уас куы бафтауӕм, уӕд дзы рауайы Уастарги — Уастырджи. Таргитай уыд скифты фыдӕл, сӕ фыццаг паддзах, цард, дам, скифтӕм Персы паддзах Дари куы ӕрбабырста, уымӕй мин азы размӕ. Куы амард, уӕд ӕй Хуыцау йӕхимӕ айста, адӕмӕн бирӕ хӕрзты кӕй бацыд, хӕрзаудӕг, адӕмӕн уарзон кӕй уыд, уый тыххӕй, ӕмӕ у йе 'ххуысгӕнӕг, скифтыл, сӕ фӕдонтӕ ирӕттыл аудӕг.
Георги та, Бирӕфӕфыдӕбонгӕнӕг ӕмӕ Уӕлахизхӕссӕг Георги дӕр ӕй хонынц, цард нӕ азнымады цыппӕрӕм ӕнусы. Мӕнӕ куыд фыст ис Стыр Советон Энциклопедийы уый тыххӕй:
"Мифический христианский святой. Церковная легенда рассказывает о казни Г.П. (в Никомедии ок. 303) во время гонений на христиан при Диоклетиане, о чудесах святого (в т.ч. о победе его над драконом). Первоначально считался покровителем земледелия, позднее феодалы в Европе создали культ Г.П. - святого патрона рыцарства. В Древной Руси Г.П. часто изображался на княжеских печатях и монетах, в царской России — на государственном гербе". Ныр та ис Мӕскуыйы гербыл.
Чырыстон дин ирон адӕмы ӕхсӕн чи хӕлиу кодта, уыдон иудадзыг архайдтой нӕ фыдӕлты дин ын йӕ быны фӕкӕныныл. Уый тыххӕй аргъуантӕ дӕр фылдӕр арӕзтой нӕ кувӕндӕтты бынӕтты, кӕнӕ сӕ фарсмӕ. Чырыстон дины уаз адӕймӕгты ӕмӕ ирон зӕдты нӕмттӕ иухуызон кодтой. Афтӕ рауад Уӕлахизхӕссӕг Георгийы номӕй Уазгеорги-Уазджеорджи, ӕмӕ сабыргай Уастырджийы бынат ахсын райдыдта. Уастырджийы кувӕндӕтты кувын райдыдтой Уасджеорджимӕ дӕр. Уӕлдайдӕр та фӕззӕджы кӕрон Чындзӕхсӕвты мӕйы Уастырджимӕ кувӕн къуырийы, йе стыр бӕрӕгбоны.
Бӕрӕгбоныл, Ирыстоны чырыстон дин чи парахат кодта, уыцы гуырдзиаг миссионертӕ сӕвӕрдтой Георгийы-Джеорджийы ном, гуырдзиаг дзырд оба — бӕрӕгбон ыл бафтаугӕйӕ. Ӕмӕ дзы рауад Джеоргуыба. Ном Георги ӕмӕ Джеорджи иу сты. Джеорджи у йӕ рагондӕр хуыз. Хуссар Ирыстоны ма йӕ Гиуӕрги дӕр хонынц, Джеоргуыбайы та Джиуӕргуыба.
Уастырджи ӕмӕ Уасджеорджи — Уасгеорги кӕрӕдзийӕ кӕй нӕ хицӕн кӕнынц, уый, кӕй зӕгъын ӕй хъӕуы, раст нӕу, алкӕмӕн дӕр йе 'гъдау йӕ гакк у. Кӕд чырыстон дин райстай, уӕд ын йе 'гъдау дӕр кӕн. Кӕннод сӕ хӕццӕ ма кӕн. Уыцы аипп тынгдӕр хауы нывгӕнджытӕм. Кӕй ныв кӕныс, уый истори уал рагацау ирон адӕмон сфӕлдыстадӕй сахуыр кӕн, стӕй дӕ бар — дӕхи. Алкӕмӕндӕр йӕхион йӕхи хъуамӕ уа.
Ирон адӕмӕн Уастырджийы фӕлгонц сӕ цӕстытыл куыд уайы, уымӕ йӕ ӕввахсдӕр сӕ нывты равдыстой Дзантиаты Юри, Саггаты Эльбрус, Гасситы Умар, Дзанайты Славӕ ӕмӕ иннӕтӕ.


Хазби Цгоевскачать dle 12.1


 

 

 

Комментариев 1


АЛАН БИГЪЛАТЫ
АЛАН БИГЪЛАТЫ 18 марта 2009 22:57
ТЫНГ МАЕ ЗАЕРДАЕМАЕ ЩАЕУЫНЧ АШЫ РАДЗЫРДТАЕ. ФАЕЛАЕ ХУЫЗДАЕР УАИД УАЕ САЙТ ИРЫСТОН МАЕ ИРАЕТТАЕ КУЫ ХУЫНИТ МАЕ ДЖЫ АЛШЫ ДАЕР ИРОНАУ КУЫ УАИД! УЕДТАЕМАЕ ФЫЛДАЕР ИУЫЛДАЕР УЫРЫССАГ АЕВЗАГ НАЕ ИРОН САЙТТЫ ИРОН АВЗАДЖЫ АМБАЕРЗЫ. НАЕУАЕГ ХАБАЕРТТАЕ ТА ИРОНАУ БЫНТОНДАЕР НАЕЙ ТЫНГ УАИД АНАЕХЪАЕН ЗАЕХЫЛ ЦЫ НАЕУАЕГ ХАБАЕРТТАЕ ИС УЫДОН ИРОНАУ КУЫ ФЫСТАД ШАЕУИККОЙ. АФТАЕМАЕЙ ИРАЕТАЕ САЕ МАДАЕЛОН АЕВЗАГЫЛ АЛШЫДАЕР ФАЕРСИККОЙ!!